ناسا كتار
ظنو السياسه عجن و عواسا
وواحدينا كتار
قالوا الحق حقهم
وياهم ناسا
والمتعوسين حرسو
يتقاسموها ميراثا
وخايبين الرجا
يحكو في ريسينهم
رايح ليهم الدرب
يكوسو فيهو كواسا
ود الحسن وجماعتو
وود طه من ساعتو
والنافع الله في امانو
وود الترابي الافتي
بي ضرورة سمعو وطاعتو
لمولمو ليهم عسكر وبنادق
النشيط منهم قام
قبال البواح بيصابق
الشوارع اتقفلن
الكباري ستفوها عوايق
ود الحسن وقف قدام خلق الله
حلف بالخلقو
قال بلدكم ..بلد السواد
لقايناها جنازة بحر
عضامو ما بتتلمه رقايق
وكتين الجد كبس
والخلق قامت تهبش راسا
النضيم انكتم
والقطيم لبد واتواسا
والناس الغشام سرحت
تتلفت تكوس في الساسا
لقوهم مما جميعهم
كل زول اتخارج
وخارج معاهو مالا وناسا
الزول المن زمن الجهل
في مصر بتضاري
زي لمح البرق
مرق لمصر يتجاري
واب سريويلا مدلدل
زي ضرع المعيز الداره
رجع للانجليز
قال الدواس بي بره
والدنيا دوام دواره
ناس حمبره
وكت البواح بوح
في بلد الحبوش
اندرعو
وكتين شالو النفس
كلامهم كتر
شرالبلد بي سرعو
سو اللجان
يكوسو في الجرجير
لا لمو في الحمرا
ولا الخدرا
ووكتين قالو
بندورالقروش
نحارب دين
ود فلان وشرعو
بالمتر الكبير
كبو ليهم الشرتيت
الحيشان اتملت
والناس لسع
يا ريت تزيد يا ريت
الجابو الارانب
من البلباص
وقفوا نص البيت
قالو بندور حقنا
شحدنا وفترنا خلاص
وكتين جا
خمش امتار
الكبار افرجخو فوق
الاسترليني والدولار
خلوا لي ناس حمبره
الفكة حمارو خدار
الناس اتفاقسو
وناس حربسو
وناس صرو الوشوش
وناس اتخانقو و اتصرعو
وكتين الجوصفا
لي ود البشير وود طه
اتأكدو منو العوير
ومنو السالت
ريالتو دلاهه
فرزو عيشتهم
قالو البدورنا يدورنا
ومن الحاسد البياباها
النافع الله
الخيرخيرنا ارض وكاش
هاك يا فلان قصر و معاش
وات يا زول بنبرك
بي ولاية خريفا دعاش
انت يا الدولار
امرق نشوف ليك سفاره
وانت يا شيخنا
اسكت ساكت
واعمل طاش
يا سجنا مسوحو غباش
والمانع الله
من الحبس والذله
وات يا ابو الزمل
يا مشروع وعماره
وات يا زول ما مننا
امشي قول ..زي ما تقول
شوف اكان بحرك شعره واللا بهمنا
تجارتك دي عندنا
وين تلقي ليها دباره
ومن بنات القبايل
ما تعشم ليك
في مره مننا
في مره مننا
ولا ركوبه ان شاء الله
حتي حماره
